عندك اتوقف ولا اقدر استزيد
يوم تمليني مشاعر للسحاب
والمس احساسك شرايين ووريد
وارتمي مفقود لاحضان الغياب
ياهوى المجنون وانفاس العنيد
يادفا الأيام واعتاق السراب
انتي اهلي يوم ضموني وحيد
وانتي المكتوب في صفحة اياب
لابتسمتي انثر اشواقي جليد
لأجل تقرين ابتساماتي ضباب
وان مشيتي حافيه فوق الصعيد
استلذ الحرف مكتوب التراب
ياكمال الروح ياغيد وجيد
ياهوى ابراهيم واسرار الجواب
في عيونك ديمة الحب الفريد
كنك الهتان وعيوني رحاب
سيدة كل المعاني والقصيد
لاكتبت الحرف صرتي له جناب
يحضر الالهام ويردد يعيد
لاجل اناجي نظرة عيونك عتاب
بنت رجال على العاصي شديد
واخت من سير مع الفزعه ركاب
حبك احساسي لوقفات العضيد
في حنايا الصدر وداني وجاب
اسكني في صدر من ضلعه يقيد
باسمك اللهم ثم انتي عذاب
ياوجود الوجد وشعور الشهيد
ياغناة القلب وسكون الرهاب
أبشري بالحب والراي السديد
لو يخون الحظ من رأيه صواب
امني واغفي مع الفجر البعيد
ياعسى الاحلام تفتح كل باب
وانثري عطرك وعيد لكل عيد
واجمعي انفاس تشهد بالنصاب
ياغناة الروح احساسي جديد
لو يطول الوقت اعجابي شباب
في عيونك يطلب الشوق المزيد
والكحل ذباح من تحت النقاب
الحنين امسى على فقد الفقيد
عنه سيرات الوله صارت كتاب
احضري تغريدةالطير الشريد
في حضورك شلت من صدري هضاب
في كرامة نفس واعزاز الجريد
يوم هامات النخل فوق الرقاب
لو يكيدون العواذل كل كيد
كيدهم قطع اناملهم بناب
اكسري كل القواعد والمفيد
انتي القانون واحكام العقاب
سطري شعرك موازين ونشيد
في رجاحة عقل تغني عن زهاب
نبض قلبي ياعسى عمرك مديد
فيك اجرم داخلي واسلم وتاب
لو عصاني القاف من ماضي بليد
عندك الهامي نواميس وشهاب
حبكم سجل كشوفاته بقيد
ماتغيره اليالي يوم طاب
والختام اني مع غيرك زهيد
كل من حولي مشاعرهم هباب
جيتك اهجوس الغلا وابغا استزيد
يوم تمليني مشاعر للسحاب
ليست هناك تعليقات:
إرسال تعليق