عمر الخطا

عمرالخطا ما كان باعذار واسباب
يامالك حس الوطن في ترابه
خل الوفا منهل ولو خاطرك شاب
تدري بعمرك يوم قلبك نوابه
هذاالأمل باقي على كل الابواب
ميرانت حاول والتمس في حجابه
فاقد رجا ادري ولاخاطرك طاب
والطيب عندك والردى في تشابه
احساسك اصبح مثل ضرس مع ناب
ماعاد تدري بالألم وين صابه
ماتذكر ايام الفرح والهنى هاب
كنك لحالك عايش وسط غابه
لكن ابحكي لك عن انسان طلاب
للمرجله عنده حساب ولابه
دايم يسولف في الحقايق وباسهاب
ويقول ماعمري مشيت النهابه
في ماحكى مره عن احساس غلاب
عن حبه الي كاتمه في رحابه
اشغل خفوقه خاطره دوم ماغاب
واحساسه انه عل قلبه وعابه
لكنه امسى وحدته تفتح الباب
للصمت ومشاهد سنين الكآبه
يقول لاتأمن خفوقك من احباب
كل الطرب في هواهم ربابه
المسأله تبدا بنظرات واعجاب
ثمن على اشواقك تكون العصابه
ماعاد لك حيله تدافع ومرتاب
وتحس باللحظه سنين عجابه
فاقد سكون ومانت داري ومنصاب
وامواج تلطم بك مراسي مصابه
اصوات تنعي لليالي وتغتاب
ولافيه عاشق يقدر انه يجابه
لاتعتقد انك صويب وتنعاب
صدقني انك فوق مثل السحابه
المشكله خايف ولاتحسب احساب
للعقل والمنطق وغاوي الصبابه
هذي حقايق ماعطاني ولاجاب
الامراحل عاشق في سرابه
خذها نصيحه ياخفوقي بترحاب
من شور راسي يوم عشقي كتابه
لاتلتمس في رحلة الحب غياب
وخل المراجل منهج يقتدابه