تبقى الخواطر فالعطايا سقيمه
لاصار صاحبها يكابر ولا قال
وجدً يشاكل صاحبه او يضيمه
رحماك ربي من عنا ضيقة البال
اركد عسى بيض النوايا تقيمه
ياخاطري كلن يعاني من الحال
ماني من الي يرتجون الرحيمه
يمناي تبطش بالمهازل وبتال
لكني ارثي حال فكره يتيمه
وش ذنبها يغدر بها الف رجال
افعالهم دون الضمير وشريمه
ياونتي جولي بشيله ومثقال
مالي هدف لكن حياتي كريمه
والمخلب الي طال لابد ينزال
لي مسندً راهي ولي قلب ريمه
الجادل الي خلت الطفل خيال
تدفع طموحي في سماي وتقيمه
وتسعى لبسماتي ولو ظيمها طال
بنت المراجل عون في كل ظيمه
نشمية الموقف لمى عنق يختال
مجنونتي اخت القمر ياعظيمه
مجنون في حبك والاطياف تحتال
غرووً كسب من كل شيً سليمه
مفقود في ظل الحياوي وبهبال
مثل المطر في جيتك تحت ديمه
والعشق راوي شوف لاكان هتال
يالي كتبتك في قصيدي اااليمه
خلك هنا واغفي سوالف وترحال
ماهمني غير الحيا وش يديمه
والمجتمع لاهي والافكار تغتال
من علم الطفله حكايا دميمه
واحرق وصالك يالبرأه ولازال
كيف الطهر اصبح ثنايا قديمه
والعولمه لحن ويغرد على المال
ليه القيم باحت ولاعاد شيمه
في روس اشناب المهاطيل والفال
حتى العبايه تنتخي كل قيمه
اسرارها فتنة شوارع لميال
حتى المحارم للمحارم غنيمه
والعرف منهوب الزوايا على جال
يالا ااه وينك؟ انحري كل غيمه
وري الخطايا ظلم في قلب محتال
بعض البشر في عيشته كالبهيمه
ياكل ويشرب في سباته ولاطال
يومك تشوفه تذكر الله ..عليمه
وتقول وشهو من لحى العرب والخال
شخصيته من كبر نفسه فديمه
والكرش واقف والشنب عال في عال
ثمن يسولف في فرايد غريمه
وكيف افترس فكر الفرايد ولا مال
يحكي بطولات القدس في رحيمه
وكيف الفرزدق فستق القاف والدال
وكيف ان جده مات موته ظليمه
وتنصت ولاترمش مخافه وامال
ويوم ان تدور في خفايا سديمه
تلقى اجاباته فراغات(ن) وااال
وين الثقافه ياللسان اللقيمه
وين المغازي في حياتك والاحمال
حتى علوم القبيله والفهيمه
تضيع في جذر اتصاله والارسال
ياهيه.. في معنى سلامك شتيمه
روح وحلق هالشنب..لووك وإحلال
موضه وصدقني تراها هشيمه
تركب على مثلك بلا شماغ وعقال
هاذااا بلانا يازمان الرخيمه
من يوم ضاع العلم والجهل قتال
ادري بقافي هم والله يديمه
انفاس للخاطر ومسرا وتعلال
وانهي حروفي بالاسف والحليمه
يارب هب لي من لداينك معدال
