كفي

كفي على يد المقادير مخلوق
امدها رغبة سكون الليالي
لو كان جيبي من عنى الوقت مشقوق
اجمل الموقف ولو قل مالي
اغير سطوه نار لو كنت محروق
ما تقصر ايديني على كل عالي
واخفي الونات من كل منطوق
اخاف يشره كل منهو عنالي
يادار ليه الأمن غايب ومفتوق
تكفين في قصرك مواجع طوالي
ابي اخبيها عن الحي والسوق
في ذمتك يادار سري وحالي
وان ماكفاك الدمع في عنقي عروق
لو تشربين الروح سمي تعالي
لكن وش الفايد وانا كلي عقوق
من جرح غاير حرمته الحلالي
يامابنيت اوطان امجادها فوق
بيبانها تسعد حزين المآلي
زخرفتها بسمات ترضي هل الشوق
في مملكه مفتاحها للمعالي
لكن حصيلة هدوة البال مسروق
واثر الحرامي ساكن في شمالي
ردي علي يادار لو زاوية طوق
محتاج راحه في مشاهد عيالي
الجذر واحد طيب الساس والذوق
فرع على فرعين بأول وتالي
بالجوري الي زين العمر بفروق
في وجدهن خمسة نجوم لآلي
ياشهد فجري ياجنى صبحي اتوق
للنجوة الي في عزيز الخيالي
ابنتصر في خالد الحق بحقوق
مليت من سبعة حروف خلالي
حتى ولو جارت بمنخل ومخروق
ترى الأراده تصنع الملح حالي
مهما الأفق عيى على القرب للنوق
مايثني القيض العزوم العوالي
مصيرها توصل على ردم فاروق
وتشرب قراح الوصل بارد زلالي
يالله كفي ترفع البوح والعوق
مخطي وتايب في رجاك اتكالي

مرسم

مرسم وممحاه وسطر وانتي وليلي والمكان
يازحمة اللحظه وانا كلي مشاغل عاصفه
جادت مشاعل خاطري فزعة نشامى واحتضان
ماكني الا راس هالمجلس ابلغ سالفه
ساكت ولكن كل احساسي يسولف للزمان
بالمرسم الي خط عنوانه بجمله تالفه
ياراس مال العافيه ترى الخساير في الهوان
تكفى تكسبني هدوئي باليمين الحالفه
ماغير اهذي في قصيدي واطربه ياليلدان
اوتار اعزفها بصدري للحنايا الطارفه
يالعنبو جد الشعر فاضح يوردك الجنان
اصد احساسي لقا لكن بقافي عارفه
ماقدر اشيل الحرف واعذاري بحلقي احتقان
شابت عوارض  لحيتي كيف اعترف بالنايفه
دايم اراقب ساعتي وترد لي آن الاوان
ماتدري ان الوقت عقربها وهي متخالفه
كلن يناجي خاطره يبحث بدربه عن حنان
هذي المشاعر ساميه باسم الهوى متحالفه
وشلون معزوف الغلا يكمل بلا عزف الكمان
ياشلة الهجران جودي في العيون العايفه
عموم ماهي قصتي ولا لي بتمجيد الحسان
ولاني من الي يسمع المقفي حروف اسفه
ياكثر هقوات العمر يوم الخطا واقع عشان
ارضي نفوس الغير في ممشا خطاي الخايفه
ماضي بعيد وللأسف مشهود من بعض العيان
كنت احسبه سري انا وأثر الحقيقه كاشفه
لو يحسب ابن ادم لحاضر صفحته بالأتزان
ماكان حيزها فعول تنوصف بالهايفه
لكن هقواتي أمل معطوف في رجوة امان
كلي ثقه بالي هدا النجدين وعينه شايفه
ابي وطن كله وطن وابيه سكنات الكيان
ابي وابي وابي وابي وابيه جمله رادفه
ابي هدوء العاصفه يرسي بصفحات البيان
مليت الملم شاعري واستر معاني كايفه
كلن يبي في هاجسه ويمنع بتصريح اللسان
وصدورنا ضاحت من الكتمان وصارت عاسفه
كن الحنايا سجن واحساسي بداخلها مدان
واعصابي السجان وقيودي معه متكاتفه
بيبانه التجريح وجدرانه اوامرهم لعان
والمنع الزامي بتعليق الصور والعاطفه
وأن مر زاير في العمر يهوى المشاعر باقتتان
قاضاه قلبي تحت بند الخاينه متعاطفه
وشهي جريمة هالحنايا غير اطلاق العنان
للفكر وهموم البشر ولدمع ماني ذارفه
يالله فرجها علي واعتق وفا مايوم خان
يارب اغفر لي وأنا كلي مظالم كاسفه

سفينه

سفينه للصحاري في الهجير ويمها ماضي
ألا ياسارية ذيك الرياح وشرعها والطير ..
سكنها القيض في صمت مخيف وسطحها فاضي
ظلمها المستحيل الي وعدها كل شي بخير..
هجرها المد بانفاس البعاد وامره القاضي
... كساها الرمل في شاطي السكوت وخطها والسير..
عقب ذيك الاحاجي في المحيط وشيخها راضي
خذلها البحر في مرسى الخيانه لحظة التقدير

المعاتب

الجو رايق والهبايب معاسير..

..مير انت علمني وهات الأفاده

كرر سؤالك يانسيم التباشير..

..صدّق تراني ماسمعت الإعاده

كنك تقول ان الأماني طوابير..

..وتعتب على مقعاد يروي براده

تشره على كفخ الجناحين والطير..

..ماتدري انه للفرايس إباده

روح وناقش جمع نجم المشاهير..

..وآسألهم اكتافي وهات الوساده

واذا تفسر بسمتي بالمقادير..

..عز الله انك تنوصف بالبلاده

انا من الطعنات روحي مشاوير..

..والجرح فيني يستحق القلاده

ماهو بذنب اني اعيش التفاسير..

.. ابي اطمن خاطري واعتقاده

اضحك وانا قلبي غزته المحاقير..

..علمني الاحساس سر الإجاده

مادري حياتي تستحق التقادير..

.. والا ان موتي يستحق الإراده

غبني وانا طولات ربعي هل الخير..

.. الي لوازمهم رقت للإشاده

ماتدري ان الخاتمه فعل تقدير..

..للغربه الي ساكنه في بلاده

هدي جموحك بالعتب والمحاسير..

..القلب ادرى بالذي في مراده

بارضيك لكن هد روعك وانا اشير..

..خلك مع جنبي وشد العقاده

ترى الإراده ماتحل اي تقصير..

.. ان كان صاحبها غلط باعتقاده

خله يجينا سيد كل الغنادير..

..في يوم لاجابه ضميره وقاده

لكن حذاري تفضح السر والبير..

..خله بكيفه يحتكم للنقاده

وان خفت يتعب خاطري بالدواوير..

..بلسم فؤادي من ضميري عياده

في وقتها شد الهبايب بتكبير..

..ماعاد تعنيني حروف انتقاده

سطر كلامي وقتها خوش تستطير..

..وارسم على الخطين لأجل الزياده

ماعمر مكسور القناعات بيسير..

.. ولا كل خائن يعترف في سواده

قالت

قالت جروح البارحه كيف تنساك
قلت العفو ياسيده من خرافه
قالت علامك تقهر الليل بخطاك
قلت الوصل ماهاب الا اعترافه
قالت ولكن المواعيد تجفاك
قلت اشكرك هذا عذر للمسافه
قالت ترا الجوال يكفي بلقياك
قلت ان صوتي يشتكي من جفافه
يابنت انا ادري بالخطا باب وصكاك
ماعمر مشهور الفعايل مُعافه
كل الحكايا كذب والصدق ينجاك
ترا الخيانه للفضايل سخافه
انا كذا طبعي مع الصدق ببلاك
اخاف ربي وانوصف بالقيافه
قالت تعوذ من شياطين تبغاك
والا غرورك يحتكم  للهيافه
تراك ماتسوى بدوني وانا اهواك
والحب اعمى والحنايا ضيافه
قولك قهرني وانت في بالك اشواك
وانا تواصيف الوفا والظرافه
لا تعتقد اني مع ذاك او ذاك
والا ان سوقي عاطفي ياحسافه
انا مواقف بنت تسواك تسواك
والبنت شيمة اصلها واعترافه
وادري الخطيه فعلها شين وهاك
خذها يمين الله وكعبة طوافه
ماني رخيصة نفس ولو جيت بنهاك
لكني اقدّر حقوق اللطافه
قلت المعاني في الذرابه تحراك
والمسأله مثل العسل والكنافه
امزح مع الخاطر وكم قلت يفداك
وانتي مواقف للعهد وارتشافه
انتي الحيا وانتي الطهر رسم يمناك
وانتي طوايا الصدق وانتي عفافه
ياحظن دافي ريح القلب مسراك
يابسمة الخاطر وروح ارتجافه
الى هنا صاح الفجر هات مركاك
قم يامعاني الحب لم التفافه
راحت ولكن في فؤادي تمساك
يالله ترحمني من  افكار قافه

هـلـت

هلت بقايا غيمتي عقبها شمس
.. زانت عقب مازاد في البوح قطره
يازينها لحظات في يومي وامس
.. والرمز واضح بس في العلم شفره
في رجوتك ياخاطري صحت في همس
..  واعتب على تمثال بخلك وكبره
تكفى سنايد هاجسي ترجي اللمس
.. واوعدك ياحرفي بالفين سمره
بس انت عود لو يقولون بي مس
 .. قرينتي والله قهوه وتمره
محتاج اثورك يايميني مع الخمس
..  وابطش مع الصفحات في ضو قمره
ابي اعلم مرسمي ثورة الطمس
 ..واجبّ ماقبلي بإحساس امره
ودي اغرد في المعاني كما الجمس
.. لاشد به مطنوخ دبّل ونمره
شخّل شكامينه مع الدوس كالحمس
 ..واعطاه طبلونه مع لون جمره
وادري ترا احلام بالهامي النمس
.. عذبتني ياقلب يومي وبكره
غيبوبتي كالقبر والهامي الرمس
..وانا اتحرى خاطري كود غمره
والامر لا يهدي ومعناه في دمس
 .. مثل اللبن لا راب من فعل خمره
وارجي سلامة من قراني بلا غمس
 .. مشاعري باحت بهقوات زفره

ليت الشعر

ليت الشعر يقدر يزيل المشقه

..كان البحر حرفي وعنواني البوح
همن يطق بداخلي الف طقه

..ويامر على صوت الحنايا تجي نوح
كيف الضحك وشلون كيفه وحقه

..راحت سنين ماضيه ظلها الدوح
ياعـاذلي ليـتك تجيني برقـه

.. كافي بجمـر داخلي يحرق الـفوح
مير اني اكابر برعدي وبرقه

..ميت ومن حولي كما الباب والشوح
والله ماغربل فؤادي وشقه

..غير اني اتعب من عنى قربة الروح
يالله ترحمني براحات وشقه

.. تغسل خفايا المختلط داخلي ضوح

انحدر ساقي

انحدر ساقي الي ما مشابي لزلات الخبال
اه ياغبن ساقي ذيك الاحلام واعطى لونها
زاد فكري بشيلات المعاني وارخاها وشال
ياحـياة المـعنى لا تـعنى وقـام  يعونـها
والله اني صمول ولاعرف خاطري حد المحال
مير ياعزتي لي احرق الروح في مكنونها
ماعرفت الهزيمه في طموحي ولافكري هزال
واحمد الله ربي في الكبيره وماهو دونها
ناظم الشعر في خيره من امره وتحديد المقال
لو يقولون باشر في قصيده وحط امتونها
والحداثه جميله بس شرط الشعر قدح الفتال
لو يصور بقافه كل هالكون في صالونها
مايعذرب سمو الشعر شاعر يسوق الاحتمال
والموازين تقبل قسمة البوح لو يلوونها
اما نثر الحروف وتسمية ذاك بالشعر الجزال
فالمجالس ذكيه تعرف الجزل من راعونها
وانا ماهمني شهرة  اسامي ولا نكسة عقال
قد رواني قصيدي شهم الأبيات من  مجنوها
لكـن المسأله فكر وفرايد وشيلات ثقال
همني كيف تحفظ في الدفاتر ومن بيصونها
الفضا ضاج بالي دون صدقه وعرف للخيال
والجرايـد تملت بالهـزايل على مخزونها
فلا يكابر بسومه من ربح بيرقه باسم الكمال
والحقيقه دراهم من بيدفع ومن يعطونها
فالي اشوفه انه هالبرامج بترخي الأتكال
سوقت للهبوط ودغدغت جيب من يشرونها
 وانتم اهل العقول الراجحه واهل تفنيد السؤال
واحكموا ياقضاة الحق فيها وفي فرعونها
والمراجل مواقف والصداقه مواجيب الرجال
كل هالكون مايسوى اذا كلمتك بتخونها
صاحبي غبت عني واسود الليل جاب الانعزال
لي سنه ياخويي اغصب الروح عن قانونها
يابو عبدالله الي كل ماصحت ناداني تعال
زاح همي وسكن جور الأيام عن مضمونها
ادعي الله يلطف بك فلا عند ربي شي محال
قادر الله ياحمد ترجع العين في مفتونها
وانا مهما توقف سر تفعيلها والأتصال
باسكب الصبر صفحه في حكايا نعاس جفونها
مادريت السهر الا ذبحني وطال العين طال
والحقيقه مشاعر في خفوقي تجود فنونها
دايم اقول زايل كل شوقي واشوفه لايزال
يوم اناجي هدؤي في عيوني واصارخ دونها
مير ياعزتي للي مغّرب يبي درب الشمال
ضالته في جنوبه ثم جادل نفته عيونها
اسكنتني عروق  ودم جاري  وتحفيز القتال
لكن المعركه روحي وقلبي وسيف فتونها
اه ياجمرتين ورمش اكحل ونظرات وخال
غيد اغنج جفوله في سموه وهمس سكونها
ذيك يالي خذتني للسعاده وضحكاتي مثال
تعرف اشلون ترسم ابتسامات من يبكونها
ياعساها براحات الليالي تجي مثل الخيال
زاد شوقي لشلال المواصل  وبوح مجونها
قد تساوى حنيني سالفة عمرها عدى الكمال
ارتقت فوق بسمات الوطن  واعتلت في جونها
يامسائي ترفق طال ليلي وجاوزني وطال
والسحايب بفكري اينعت وردتي بغصونها
شفني اضيع ثم ارجع  لها واعتنق مالا يقال
جو ماطر وضامي  والسبب جور هل مزونها
تاهت حروف قافي يومك اول  حروف الارتجال
وانتي احلى من الشعر المقفى ومن موزونها
باختم الفكره الي قد بدت باسم ساقي والمحال
اه ياغبن ساقي ذيك الأيام  واعطى لونها

لا متى

لا متى يالكيس الشهم الفطين
لا متى دربك ابا تتعلمه
جادت ذنوبك بشي مستبين
وانته العاقل بشي تفهمه
الزمن لحظات واختمها بدين
لايكون انك بتحيى معظمه
ماسمعت القول خير الماكرين
آية الفرقان حق ومحكمه
يمهل الله للمجوس الكافرين
كود توبتهم تجي مسترحمه
لا تقول الذنب اكبر من يقين
رحمة الله واصله للمشئمه
اعقد النيه وماش الخيرين
وماتبقى في العمر استغنمه
يالله ان تهدي قلوب الطيبين
فالخواطر راجيه مستلهمه
مسلمين ارواح وانفس مسلمين
والحنايا بالصدر مستسلمه
صور المشهد وعينك في الجبين
والقوى خارت وشوفك عمعمه
والصدر مخنوق والانفاس وين
وقلبك الي غاص لايدفع دمه
وحشرجت روحك تناجي القاعدين
وصوتها دمر هدوء  الملحمه
وفوق صوت الموت ماضيك الدفين
مر قدامك وفاتح لك فمه
نزعها في ظلمته صمت وأنين
وصوت هالدنيا سكونه يلجمه
مظلمه في مظلمه في حاجتين
التسوف ثم ذنب تكرمه
والله ان الخاتمه ساعه وحين
ساعة الميلاد تبري المرسمه
خط ماتبغى بصفحات السنين
فالمقدر منتهي في مقسمه
الكنوز من الذهب ومن اللجين
تجلس لميراث منهو يعدمه
كلنا في يوم بارد راحلين
والبقى لله ثم المرحمه
خالقي بالأصل في ماء وطين
ليه انا اتكبر وروحي مبهمه
وقتها يالكيس الشهم الفطين
العداله والرجا في  المحكمه
تبت لك يارب والخاطر حزين
والندم اكبر من اني افهمه