سلواي

سلواي دايم في مراسم ظنوني
امسح وانا اكتب مانطقته وانساه
ارسم اماني شفتها في عيوني
لكني اداري رسومي بممحاه
وش حيلتي دام الهواجس يبوني
والجوف بارد في ترانيم رجواه
رجوا زمن ينهض بتقدير كوني
والله يعلم خاطري حيل يقواه
كل الشوارع فاضيه من يجوني
وانا الوحيد المرتجي صبر يهواه
ياقاسمة كل الظهر في طعوني
تكفين فزعة سرمدي شق مسراه
انا ظنوني عاتبت من مجوني
والحيل متعبني شكاوي ومقساه
احلامي اكبر من طموحات دوني
والضلع ماساعد طموحي ومسعاه
يال ااه  جوفي حددي فيك لوني
خليني اشره محزمي قصر وانهاه
يالله سلم اخوة فارقوني
قلوبهم بيضا ومبداهم الجاه
لكن نويت النايفه وامنعوني
والمشكله لا خالف العلم مبداه
انا لها ادري ولكن نفوني
كيف اقدراسمع عذرهم واخفي ال اه
اشياء صارت فاصله في جنوني
يوم الفواصل لابن ادم مزاياه
ماودي الا وجدهم في جفوني
ياكيف بقدر فكرهم واتمشاه
عموم مابنسى تفاصيل عوني
فالحب عذري والتفاصيل تملاه
الجادل الي اغرقت في مزوني
ثم امطرت قلبي تعاليم نجواه
في عيونها اشاغب وكم سامحوني
احبها والله والله والله
يا اعذب من النشوه واصدق فنوني
في لوحتك هذا القلم باتحداه
ماغيرها انثى ولو ناصحوني
هي وحدها تامر بقلبي سواياه
والخاتمه مرسام خيب ظنوني
لكن ابكتب خاطري والجم افواه

مرسمي

منتهي ريح العجاج بمرسمي
رافق الادراج واحساس الظلام
ممتنع عن نزف صارخ في دمي
واعلن اظرابه ورسمه للكلام
قلت باشاور في الليل اسهمي
يمكن ان طال السهر حل السلام
تقرب ايدي له ويأبى معصمي
يلتفت يرفعه ويطفي الخصام
للاسف عيى يبوح بمُلهمي
والعتب زود مفاهيم الملام
مانفع حتى بضمه في فمي
والمشاعر طاغيه برد وزحام
قمت اناظر له واسعد مبسمي
والتفت يمنى ويسرى بانتظام
ياخوي الدرب هذا موسمي
ودي اشرب لهفتي بعد الصيام
شابت اللحظات بإحراق انسمي
والدفاتر لفت الشكوى لثام
قال ياعيباه وانا لك سمي
بس افهم ليه شديت اللجام
مرة تلهم حكاوي اعجمي
ومرة اتعب وانا سطر وهيام
ملت الصفحات وانته ملجمي
ودي ابين يماني من شوام
جار صمتك لي ولا انت بمكرمي
يوم احس النبض بابهامك غرام
مامنعني غير خوفك يا ادمي
والسكوت اجبر معانيك التزام
كنت من اول سلاحك وارتمي
في بحور الحرف نرقى للسنام
مانحسب في مفاهيم الرمي
خل من يقراك نهديه الوسام
كم تبريني وتشحذ محزمي
يووه كم اكرهم لاجيت بتنام
ودي اسهر دفترك بوح عمي
دلني تكفى ابي القى مرام
قلت وش يرجي ضماي من الطمي
خلني ساكت ونكتب شي عام
ماهي بيديني ارمز واحتمي
لاجله ارضى القدح في شعري واُلام
ان تبي ترضي معاني طلسمي
او فلا تفتح لجبهات الانام
الله اقوى ياهجوسي درعمي
لاجل القى لك طريقه في النظام
عيت احباري وعيى مرسمي
باحفظك نوتات في سر المهام
خاتمة بوحي كما اني ظمي
او كما تهجير فجري للقيام
شفت موتي في جهول المعدمي
والتفت وقال بان العمر تام
يالله ان تلطف طلبتك مغنمي
في جنان الخلد تقسم لي مقام

جارت

جارت سوالف هالزمان وتناسيت
لأجل اقدر ادمح زلتي حق روحي
ياصاحبي من منبع الحق ناديت
كذاب من اعلن عدالة جروحي
تعبت والمعنى ابنقل ومليت
من ظرف بعدك يارسايل شموخي
قالوا تغانم مابقى لك وسجيت
وشلون اعفي منصبك من طموحي
الأوله ياعاذلي دامك ابديت
رغبه لمشروع الامانه بنوحي
ليتك تعرف ان الاماني تناهيت
ياشين قم غادر بلا هالنصوحي
انا من الهجران قلبي كما البيت
والا كما برج الوليد النطوحي
مليان بإحساسي سوا رحت او جيت
واعرب المعنى براحات بوحي
سلم سلم من هو في النار كبريت
اشعل خفوقي لين علقت لوحي
ياغايبه في شاعر الوجد ونيت
ونة مغادي مايفكر يروحي
ابسألك ؟ ياكامل الجيد والصيت
تعبت اجاوب والمصحح شحوحي
متى! متى! القى لهالبعد تشتيت
موجوع ياكلي وسكناك روحي

لو راودت

لو راودت فكرك مع هجعة الليل
صورة طموح قد تعشاه غيرك
فلا تنتهي غربه ولاتنتخي الويل
واعرف ترا بان المقدر مصيرك
لكن وش الي سكن الأرض بسهيل
غير الأمل في كسر قانون سيرك
مشروع لاحلام الاماني وتذليل
هذي الصعاب الي تشاغب ضميرك
هو حق لك واكثر مع وافي الكيل
حتى ولو كل البشر تستثيرك
وان زحمة الونات قد شابها ميل
لملم بانفاسك واهجر سريرك
كافي برمز القاف شيله وتحميل
ابنثر المعنى ولا بستشيرك
ياصاحبي تعبان ماعاد بي حيل
والوضع مايخفى وربي يجيرك
اخاصم انفاسي وانا احط واشيل
واهد وابني في مشاريع سيرك
وانته ولاتدري عن الجيش والخيل
لاهي بتسيس الفرايس بطيرك
طاغي حروفك سكنت جيل في جيل
واحساس يسحب من عدوك ظفيرك
ياحسبك الله تطلب الكيف والهيل
وتامر على اوطان المشاعر سفيرك
هناك من يجلب لك الوقت تسهيل
والغير ضاعوا في دهاليز بيرك
خاين لنفسك والعطا منك تبخيل
ظالم لروحك يومي اعرف شويرك
ادري بقلبك طاغي الوجد كالسيل
ليه التواجد في نواقع تضيرك
اشقر واغنج في جماله تهاويل
مهجن الانساب ضاوي وتيرك
والقد راوي جوفه  الخصر كالويل
طاوي لاحضان المعانق عبيرك
مكحول رمشك فصل الحق تفصيل
ياويل حال الي غرق في غديرك
سالم من النقصات والروح تكميل
ليتك تعرف ان السمو هو يديرك
فالحق على ذيك الرياح الهماليل
في داخلك واختار منهو ينيرك
والخاتمه بافضل الصدق تفضيل
لنته كبير لي ولا انا عشيرك

اوراق

 

 

عج الرياح اوراق تشتاق لقلم
ضاعت حروفي تعصف ببوح الأبي
كن الهبوب احبار والموعد الم
كيف القلم يكتب سنايد ما ابي
ثارت فواصل خاتمة سيف وعلم
عنوانها المجبور حدد مطلبي
الأوله لاصار في عمري حلم
ليه البعض اجراه في حكم الغبي
والثانيه الاحساس لما ينظلم
كيف العدل ترضى المشاعر تنسبي
حتى الخفوق الي من الآخر سلم
 مشكوك في نبضه وصدقه ويهبي
صرنا نطبق في طبايعنا فلم
مستورد الافكار معطوب الجبي
كنك بصرخات الجمر عندي هلم
طالبك ياربي ترسي مركبي

انا يابنت

 

 

 

 

 

انا يابنت ذاك الي على خبر السهر ضمك

احير في سما عالمك ضحكاتي وضيقاتي

انا الانفاس اذا ودي اسكنها على شمك

واذا حبيت لو ابغى تخانق زفرة اهاتيي

اثقل الحس في طبعك برودك ساكن بدمك

على باب الصبر مغرور وتتحرى لعثراتي

ياشين النفس لاكانت تشاهد نظرتي يمك

تظنيني اكررها وارفقها ببسماتي

تبيني انزل بكلي لأقدامك ولاهمك

على بالك تجازيني على مرسام صفحاتي

اجل اصحي من الأوهام يا طفله انا عمك

قسم بالله لاضيع شموخك واسمعي الآتي

اذا غروك صدقانك فانا من كنت المك

واذا غرتك شيكاتك فكله لاجل وقفاتي

تحملت الجفا والظيم تحملتك على غمك

تحملت العطش احساس يوم اسقيك فزعاتي

تفاصيل المشاعر غايبه عن مبتدا فمك

معاني في غباء الاحتواء وسكب هماتي

ابزرع غيبتي داخلك باوسخ شي في كمك

لانك ميته في صدر عنوانه معاناتي

انا من لو بغيت اكسر سموك واعثر بخشمك

ترى والله ماتسوى بقلبي شي او ذاتي

ولا يسوى ترى عندي خلو القائمه باسمك

قسم بالله من بكره لو ابغى حب ماحاتي

ولكني اجملها مشاعر لاجل ما سمك

تراها يوم وصتني الأمانه جدت بسكاتي

فلا تتصوري اني اخون الوجد في ذمك

لاني صنعة الشيمه بجازي فيك غلطاتي

رهام

 

 

ييمه طحت من عين العوافي والسبب اقزام

وجازوني لنهشات الألم واهتزت الشيمه

ييمه خانني حظي بعرف الصدق والايام

اغالب دمعي وقهري بلا عزم وبلا قيمه

ييمه شابت اوقاتي وفرحي انتهى قدام

ولالي بعد رب الكون الا حضنك وديمه

انا ياميمتي صفحه بغدر الطب والاحلام

سبوني ضحكتي يمه بإسم الدم والظيمه

وثقت ببالطو ابيض يداوي ال ااه والالام

وكيف انشدهم اسقامي وانا الاعبه غميمه

تقولي طفلتي يالله مشينا والفرح اكوام

واضم ايديني بأيدك واشاغب في السما غيمه

ونوصل بعد مانتعب لباب المختبر باقدام

هلكها قيض في ممشى الفقير وذل تحطيمه

على ذاك السرير ارقد وبيدي حبل للاوهام

يبكيني دعاء امي وفني جاز تفهيمه

يقولون الفقر ساكن بدمي يوم جار ودام

وجاوز حده الشرعي وعلم في ترانيمه

ياربي كيف يتغير دمي في كيس له اقلام

وصوت الاجهزه مزعج كما الخوف وتقاسيمه

غفيت برحلة المشفى وشفت اني بفصل الهام

وهي تلعب بمرسامي وانا اضحك من تراسيمه

معلمتي ،،صديقاتي،،وهذا فصل للاعلام

وذي غرفة مديرتناومصحف سهل تعليمه

وذي باحة حديقة مدرستنا منبع الالهام

وهذا فصلنا سادس مميز يوم تكريمه

وطال الوقت باحلامي وشفت اني مع انغام

رحمها الله قد ماتت خيانة طب وتجريمه

وكانت هي تحذرني وترسم في السما اجرام

تعاتبهم على جرحي وتصرخ كبر تعظيمه

صحيت واشتعل فيني مجاري للتعب والغام

ولادري بس هاللحظه طفى لوني بتعتيمه

تنادي امي بأسمي يابنتي يالغلا ريهام

مشينا ياجنى فرحي رجعنا البيت ياريمه

وبعد كم يوم جا الاسعاف ينادي شمري الاكمام

نظن انه خطأ طبي وهذا امر تعميمه

خذوني واذبحوا فيني براءة طفلة الاسلام

خذوني للعنا عمري خذوا بكره وتحريمه

خذوني للشقى دمعه خذوني للقصص افلام

خذوني للقبر حيه خذوني للكفن خيمه

ياقلب امي تحمل مابقى للوعد من ايهام

ودمعك يايبه غالي ولكن حق تسليمه

ابشكي للزمن حالي بدوله ماتبي تنظام

ولكن شيخها فاسد كساها ظلم ترسيمه

جنوبيه اذن موتي ترى في طبعكم اجرام

جنوبيه أذن لاعقل لها ويجوز تنويمه

جنوبيه اذن لاحق لها والواجب استسلام

جنوبيه اذن روحي فدى للنفط وتنظيمه

الا ياشعبنا الساكن وطن يتحقر الاعلام

اذا ماقمتم اللحظه فلا ترجون ترميمه

وانا بدعي شموخي والقلم واحساس من ريهام

الا يالله ياربي تشافيها من الظيمه