طعون

ياضيقة البال زيدي بالمتاين طعون
ماعاد به بالحنايا وقت استقطعه
هي غادرت ماخذه قلبي وهل يرجعون
هذا السؤال المحير والاجابه معه
ادري خطاي الوجع يا اه لن يفهمون
مير الالم في الحنايا ضيق مابه سعه
ياعيد وش ارتجي انا ولو مايكون
لاكنت صادق ياعيدي هو هناك امنعه
هذا ضجيجه قرن صمته الا يقهرون
يالهفة القلب لا صاحوا عليه دعه
انا وربك قسم بالله لا مايهون
ياعاذلي ويش تامل بي بقولة بعه
هي النظر هي نفس روحي الا تعقلون
القلب في يدها ولي رب استودعه
هي الفرح هي تفاصيلي على ماتكون
هي الرصيد الي احيا به وهي تودعه
والخاتمه الامل بالله لو يدركون
وادري عتبها صعب لكن بتراجعه

اخبي

 

انثر على جار الهوى واخبي
يالله تعلم بي ومافي خبي
يسكن مع دمي ولو ما اجر
شريان في قلبي ويعلم ربي
ماعمر منطوق الليالي بين
وش معذر الونات تثني دربي
يانار في صدرك علوم الليله
شبي على ضلع المواجع شبي
اقول يامرتع غرامي وينك
هبي حضورك ياحياتي هبي
والله يالخاطر لعزا روحي
ماتت بضحكات الهوى والطبي
ابسمعك لحظه ولو ما تقدر
تكفى اعاني من وزايا حبي
ماهي على كيفي وربك والله
لو هي على كيفي فتبي تبي
ماني على هقوات راعي الدله
لا قلت لك اكرم فقومي صبي
كودة اشربك فنجال بنت الهيله
لو هي بقايا من شعورك عبي
وان زانت اللحظات هاته حسك
كبي علي الشوق هاته كبي
ياناعمه في شوق وشله تجفي
قومي اذكري ربك باسمه ليي
ارض المحبه كنت دوم اسقيها
ايدي على صحرك دوم اثيي
لكنها ضيقات جوفي دايم
ابداولا انطقها غياهب حبي
وختامها والله مابي غيرك
مهما صرختي داخلي وتسبي

الفيه

 

 

حسبي على الي دوجت بافكاري
ماغير ارتب في طيوف الغيه
علم يعلم به وعلم طاري
وش جابني لعلومه المنسيه
كل المسارح وحدت باطواري
اما البطوله قد خذتها هيه
يوم ان جمهوره يشد اوتاري
يعزف صياحي روحة في جيه
الهى بالهام اللهايب ناري
يالجادل الي تسكنين الفيه

اكتاف الرصيف

على اكتاف الرصيف الي شكى من فرقتك عامين

تسوق الريح للذكرى صور قد هدت اركاني

جلست ولا على بالي بشر يطرقوا ماشين

ولا ظنيت من حولي دروا عن صوت يملاني

بنفس الزاويه  طيفك ملا هالروح والجنبين

وشوفة عيني احساسك وبسمه تعزف الحاني

اتمتم في خفايا ماضيه لاقت لها دربين

على رغم الوعد تهنا واحدنا ضيع الثاني

كسير الخاطر ويدي على وجهي ترد الدين

وزفرات الحكايا طاغيه في منبع اشجاني

وراح الليل في مسرى وفكره زارت الحافين

بسكه كلها اشواك واسابق من تعداني

رفعت الراس مسترخي ابي انثر هموم البين

ابي اتنفس اللحظه وانسى ماتغشاني

واخذني الشوف لاول هالرصيف وبنت او ثنتين

يقارعن الكعوب الي فزع من تكهن شاني

نعم ثنتين لكن فرق فيما بينهم والزين

وواضح يوم جمعتهم كما الي قال هاذاني

سفيرة وجه ياكحل الغرام ومرتع الغاوين

تغنج في خطاويها بخصر صاحبه جاني

ركيزة ساريه لكن يسابق قسمها نهدين

بجيب عاري لبسه ويعلن من تحداني

وزاد الطاغيه فتنه عبايه تشحذ الردفين

الا ياليل ما اطولك اذا هو عاش وحداني

ولا ابطت حيل ثم مرت وانا في مقلتي تثمين

لمخزون الحياء الي فصخه العالم الداني

وردت واجلست حولي تناظر في محيط الوين

وتاهت حيل نظرتها بكل احساس وجداني

جبرني الموقف اجره قصيدي بيت او بيتين

وهي تسمع ولا تسمع بقايا صوت عناني

وانا اسف على وزن القصيده والجنا مابين

ولكن شي مثلني بلحظتها وسواني

لك الله ضاقت ثياب القصايد وامتليت الهام

ولا ادري كيف اللوح لليباس واكسر غصوني

الا ياشمري يرحم قصيد شالته عينين

بنظرات الغرابه تلتفت وتوسم اعياني

وشالتني وحطتني وقالت للقافه حين

ترى من اول اشوفك تراقبني وتخزاني

انا من علمه حبي وكنا حيل متساوين

ولكن للاسف فقته وللايام خلاني

ولكن هالرصيف وهالمكان وجلستك هالحين

هي الي شدت اقدامي اسابق كود هو جاني

وانا ماجيت للمغوى ولا جيتك ادور شين

وكيف اخون لي ديره اذا هو كل اوطاني

ضحكت وقلت يادنيا انا ويني وهيه وين

وش الي يهجد ابياته بعد ماصار قيفاني

تجمعنا لذكراهم وخطينا بعضنا لين

وعدنا هالرصيف الفقد وبانساها وتنساني

سقاك الله يالحظه تفيق وخاطرك عالدين

وتبعد عن مشاكا نفس تبي تغديك علماني

الا يابنت ابتسمي وشدي رحلة المقفين

تراها للهدوء اعدل لميزانك وميزاني

سريت ولا على كتفي سوا هم وله عامين

واكتاف الرصيف الي سكن في خاطر اركاني

يضيق

يضيق صدر الليال واشتاق لامني

ذكرت  همسة شفاه ومسكة يدينه

واناظر الخاطرالي جاك متعني

يدور انفاس  من يسوى نظر عينه

البارحه كنت قاسي كنت متجني

ماكنت محتاج في ظلمك تراعينه

تبحر بك افكار ماتنسيك ترحمني

وانا احترق صدرمن هالعجزترمينه

يامنبع الذوق جيت اليوم تدعمني

لقيتك الموت للمقتول من حينه

المعذره نار والاهات تطعني

والسالفه عطف للأمطار والدينه 

لو كل الأشواق لامنك ولامني

تحري الوعد في اوقات تنسينه

يازهو الأيام لوفجري يناغمني

ياشمس عمري وياقمراي وسنينه

البعد قاسي وصبرك حيل يذهلني

والمشكله اوقات تبعدني وتشرينه

جتني رسايلك للهجران ترسمني

وتنوع العذر بالصفحات في عينه

ياعزة النفس كيف اليوم تفهمني

جيتك على وعد وانتي الي تخونينه

ياكبر بلواي في حبي تساومني

ماكن لي  قلب في صدري تجافينه

اموت دونك واحيابك وانا اغني

من خطوتي لحن في لعبك تناجينه

رحلني احساس في صدري يقاومني

يصعب علي ابعده لاصرت شاهينه

المرجله حد في سلم الهوا تغني

مير البلا لارضيت الدين في زينه

يقهرني الوقت وظروفي تلاعبني

ويردني شي في صدري عناوينه

خثرد

خثرد ترا بالخثرده تكسب البوح
وش جاك من صحوة عقول ندية
وان صاحب احساسك فهاوه مع نوح
فاطرب وشل الصوت من صدق نيه
ياخوك ياياسر على صاحبي روح
وسلم على ذيك العيون القويه
وتن التحايا من على خاطري فوح
وارفق على ذيك اليدين الطريه
قله تراه ابطا على الجرح والروح
وانه خدا قلبي وشوفي عليه
علمه باني من عنا الهم مطروح
وان اليالي في غيابه  شقيه
القاف مثل البير والحرف منزوح
والعمر مسرح والجماهير فيه
مير البلا ياصاحبي سر مفضوح
هي خاطري المحتوم في ضلع غيه
ياوجد حالي في هوا الغيد مشلوح
طوت حياتي طية عقب طيه
تخطي بحقي وارفع الصوت مسموح
لا واغناتي يامطير الابيه
وان جادت عيونه بدمعي من اجروح
فارجع واسف عالتعب والقضيه

يابو عمر

يابو عمر قدح الفتايل لها شان
والمسأله ياخوك اكبر من الهرج
رسم المعاني بالصور مثل ميدان
يسابق الشاعر خياله بلا سرج
يفقد حضوره في مثاقيل ميزان
واذا انطرب كنه مسير على ترج
ماني من الي ينقهر لاجله يبان
ولاني من الي يوصف الزين بالفرج
اقولها وافتح لها عشر بيبان
وامهد الونات واهذب المرج
وديوان شعري له جماهير في كان
وارجي من الله تعرف الكان والبرج
ماهو بعذروبي سكوتي ولو ران
احساسي المكبوت في حضرة العرج
لكني اجمل قصيدي بالحان
يطرب لها شوق المعازف مع الرج
يابن جلح باهديك كم بيت من شان
اشرح بها خاطر مقفل في الدرج
قل لابن موسى لا يزاحم على الدان
ترى الهوى ياخوك مقسوم في خرج
والله يرحم بن عباده ولا هان
ذاك الذي ودع دياري على الخرج