عيون السهر

خجلا عيون السهر وتشتت افكاري
وانا من الشوق اطيافه وجدرانه
لاراحة تلبس المعنى بأسراري
شـرعـت للـيل طيقانه وبيبانه
قم واكسر السد ظاجت فيك انهاري
يشره علي الشعر دام انت عنوانه
ابـو الحنين الـذي قطع بأستاري
مفضوح قلبي وانا اخاصمك منشانه
ضيعت في وجد لاموجود أو طاري
واشوف بسمة غلا للغير فرحانه
ضاقت على وسع رحلاتي واسفاري
ماكـن لك عـمر تتفـدين ولهانه
لابوك يالحب كيف تكون متداري
يـدرى هجومه واحزانه وكتمانه
وإلا انت لاهي ضحوك وخاطرك عاري
ماتعرف الموت ان جابهت كفرانه
الحان تعزف مشاعر وقع اوتاري
والصمت يصرخ بلا اصوات اشجانه
رح وانثر النضج فوق اغصان اشجاري
واوعـد خريفه بتشكيكه بايمانـه  
انـا عـطيت الكرامه كل ايثاري
ماتنكسر نفس من طغيان انسانه
واسف على حب سوقته لأقداري
ابرسمك غدر لون اسود وخسرانه
كل الثقه في مراحل سكةاخطاري
مهما توصـل لدربي فـكر شيطانه
انا اباسكن هدوئي واهجر اعصاري
يـارب بانـوي وجـملها بهجرانه
واختم مناجاة حرفي راحة اشعاري
صلاة ربي على المحبوب باحسانه

طاري الفراغ

على طاري الفراغ ونجر هالخاطر وتالي ليل
ذكرت البارحه وحروف تسكن روح هاليله
وانا ماهمني المكتوب كثر ماهمني التعليل
وما بين السطور انفاس تتزاحم بتأويله
تجي من وين؟ وين اتروح! وتتمسك ألم بالحيل
وتتهرب تناجي خاطر  الضيقات بالحيله
وتتبسم كذب او خوف وتبكي ناتج التحليل
وتتساقط وهن اوضعف وهو يأمرك تمشي له
تصارخ تنتخي باخته وباسمه والعرب والجيل
وهيهات النجاة اليوم بوادي قد على سيله
الااا يامنطق البارح بكسرات الحكي والقيل
وانا اقصدك يالمجهول واخاف بعلمك الغيله
مثل من وجه ادروبه بلا زاد وبليا خيل
بصحرا قيضها شاهد وتهلك ظهره القيله
ولما استحكمت امري بقهرات الغدر والكيل
تنبهت انها الدنيا تمول لحني بشيله
نهضت بكل ايماني وشلت احساس بكره شيل
وهاجوس الفتن يخسى عساها النار توحي له
فجتني مثل خولاني اذا زاد بمزاجه هيل
ويازين الليالي  لاصدف بالدرب تحويله
عيونه راحتي واكثر بساطه توجد التسهيل
حضوره هو هداتي لا رخيت بحضن خدي له
تبسم ياخفوقي واطرد الزفرات هم وويل
تغانم مابقى لك من جنى بسمات تقبيله
وعيد وزيد في ضم اللطايف واعشقه تبجيل
بوعد القابله عشها مع طيف ينادي له
ولملم خوف من بكره بوازع دين والتذليل
توكل بالذي يبتر عروق الخوف ويزيله
تناقض خاطري عطل طموحِ ماضيه تعطيل
ولاظنيت ياقاف النجاح تكون تفعيله
لأنك سلوتي باكتب حروفك واخفي التفصيل
وانا أتعمد اصور رموزه دون تفصيله
وياعشقي لاسرار اللغه والظاد والتفعيل
ولكن ما اباشر في معاني ترفع التيله
تلذذت بقصيدي في رسايل تكره التهويل
ويازين البساطه لاجبرت الكيل والكيله
اجي متكدر و مهموم وياجيني جلا ويزيل
يغير كل مافيني بشيلاته وتحميله
نفايس ثم لي انفاس  وهمسي والغوا تكميل
منازل للهدوء الي فقدته عند تحصيله
فسامحت الزمن والناس وقفلت الصدر تقفيل
ترى بعض الجفا مطلوب اذا باخون حبي له
وحمّلت الحنايا لحن فك القيد والتكبيل
بأوتار الأنا مغرور وتطربني تفاصيله
سأمت البوح باحساسي بليا غش او تضليل
سأمت امرر المشهد وازور دون تكميله
رفوف الزاويه ظاجت تعال اختار حط وشيل
وهات المحبره واكتب تغير في تراتيله
وانا باذيل الصفحه وبارسم لك مدار سهيل
وباكتب يالوفا اسف يغشك وانت ترخيله
الااا يالله ياعالم بقيدي اطلبك تعجيل
فرج يسكن باعماقي سألت الله تعجيله
بلحظات السجود النفس ترجح راحه وتفضيل
ويافرح الدموع الي تناجي رب تبكي له
واصلي واثني التسليم على من بلغ التنزيل
محمد هادي الأمه سنا الفجر ومراسيله