الخيمه

الخيمه الي حدرت بالمعاليق

لا والله إلا روحت من محلي

يااصحاب خابركم بروس المطاليق

ليه التزلف يازمن وش حصلي

هم ابلعوها بين ضحك وتصافيق

وانا على القيض التهامي مسلي

جاني خبرهم صبح في فكة الريق

ياعالمي اصحى سرقك المحلي

والي جبرني صيحة الذيب بطويق

ابو يزيد الي يمينه تعلي

وهذا ابو خالد مصمم وصديق

يتل عزمه للمشاريف تلي

اما ابو بسام عاقل ورويق

دايم مع الحق الوضوح المجلي

لكن بقية ربعنا هالمشافيق

يدرون لكن صمتهم مايدلي

ياعايض ابن هميل حظك توافيق

لا والله بعتنا لا والله الي

الاصبري خاين عهود ومواثيق

وش يرتجي من خيمتي هالمضلي

والاشقر الي يهضم الحق ويطيق

هو ياعرب يقدر يصوم ويصلي

لكن عسى صالح يهز الطوافيق

هو شيخنا في هالقروب المفلي

هو المجاوب ان تعجب هل القيق

يقدح صحيح القول لو كان حلي

والخاتمه اخو لنا مات في فيق

كان العضد والمحزم الي يجلي

ارحمه ربي وانج قبره من الضيق

من له بغيرك يا آلهي ومن لي

bin obad

اصبح فؤادي

اصبح فؤادي ياجمل الوقت مهموم
لو هي سنايد فزعة الليل كراس
مبطي وانا في خاطر الليل مهموم
مهما وعود القابله تخمة احساس
تعبت ماوصلت فكري لملزوم
وانا اتحرى ينشرح بالي انفاس
لا لون لامرسم ولا طبع مغروم
ماغير اخاصم ونتي واقرع اجراس
ياعاشق النخوات مانته بملزوم
احساس راحاتك معالي وحساس
يبطي عظم من ينتظر شلة رخوم
قوم على القيعان طاحوا من الراس
لابد مايظهر بطى الوقت ويقوم
ينهض ويحكي سالفة زير جساس
عموم ليت العاقله روس للقوم
ماكان جرتنا الجهاله مع الناس
عقل الفتى لا كان فاطن ومحشوم
رصين فكره يوم هو عام قد قاس
يضرب بيمناه الصعايب على الدوم
وذيك الهمايل تختفي خوف تنداس
قرم تمنى هامة الوقت في يوم
ترضخ شهامه واحضرت شيخ عساس
اما الردي في قسمة الخير محروم
والناس تفرق طبعها حسب الاجناس
عمر النسب لو شالك سنين مهزوم
مهما تغنوا واعلنوا عرق دساس
والفرق بين العرب والعجم معلوم
تقواك راس المال والكسب والساس
والمال لو يرفع احد كان محروم
تقوى الفقير اغنى ولو كان كناس
واحذر من الشيطان لو كان مرسوم
من البشر شيطانه اعوان وانجاس
والرزق لا يتعبك قاضي ومقسوم
مكتوب يابن ادم وممضي فلا باس
ولا لا يغرك قولة فلان مذموم
فانت الحكم ياشارب الشوف بالكاس
الأمعه كنه على النقص مفطوم
والمشكله دايم مضيع ومحتاس
والكل منبع للمعادن ومختوم
وصك الذهب منزوع من كومة الماس
كسب الجمايل ماتوافق مع النوم
والباب لازم له مفاصل وترباس
وغض النظر كنك مع الناس في صوم
ترى الفتن صارت مع الجاه نوماس
واحرص تجادل شخص احمق وملكوم
وان صار فاحرص لا تسجل بقرطاس
والعاقل الي لا اجتهد ابعد اللوم
ماينفع الرجال فكراً بهوجاس
والخاتمه فيما مضى قاف مفهوم
يالله جمل وصلها هب نسناس