لا متى

لا متى يالكيس الشهم الفطين
لا متى دربك ابا تتعلمه
جادت ذنوبك بشي مستبين
وانته العاقل بشي تفهمه
الزمن لحظات واختمها بدين
لايكون انك بتحيى معظمه
ماسمعت القول خير الماكرين
آية الفرقان حق ومحكمه
يمهل الله للمجوس الكافرين
كود توبتهم تجي مسترحمه
لا تقول الذنب اكبر من يقين
رحمة الله واصله للمشئمه
اعقد النيه وماش الخيرين
وماتبقى في العمر استغنمه
يالله ان تهدي قلوب الطيبين
فالخواطر راجيه مستلهمه
مسلمين ارواح وانفس مسلمين
والحنايا بالصدر مستسلمه
صور المشهد وعينك في الجبين
والقوى خارت وشوفك عمعمه
والصدر مخنوق والانفاس وين
وقلبك الي غاص لايدفع دمه
وحشرجت روحك تناجي القاعدين
وصوتها دمر هدوء  الملحمه
وفوق صوت الموت ماضيك الدفين
مر قدامك وفاتح لك فمه
نزعها في ظلمته صمت وأنين
وصوت هالدنيا سكونه يلجمه
مظلمه في مظلمه في حاجتين
التسوف ثم ذنب تكرمه
والله ان الخاتمه ساعه وحين
ساعة الميلاد تبري المرسمه
خط ماتبغى بصفحات السنين
فالمقدر منتهي في مقسمه
الكنوز من الذهب ومن اللجين
تجلس لميراث منهو يعدمه
كلنا في يوم بارد راحلين
والبقى لله ثم المرحمه
خالقي بالأصل في ماء وطين
ليه انا اتكبر وروحي مبهمه
وقتها يالكيس الشهم الفطين
العداله والرجا في  المحكمه
تبت لك يارب والخاطر حزين
والندم اكبر من اني افهمه