هاذا انــا

هاذا انا ابري مراسم واختصر
هاذا انا مجمع حروف لكلمتي
واشوفها في غيم قرب يحتضر
يبكي مطر في لون ميز رسمتي
واترك فواصل للبقايا في العمر
واهمّز المعنى رموز لبسمتي
لكني ابحـر في محيط مايقر
تعصف به الثوره ويرفع همتي
ماغادر انفاسي وصدري ينفجر
ودي اصيح بصوت يرضي ذمتي
تجرحني اطياف الزجاج المنكسر
مابين اسراري لحافي عمتي
فـراغ  ؟ لا والله ولو انه خطـر
كيف الفضاوه والشقا في بصمتي
مشغول ¡  لا تسأل رجيتك تنتظر
انا العمل في برمجة منظومتي
لكـنها  نفسي  ابت لا تسـتقر
والخوف بعثرنـي وشتت لمّتي
ماشفت راحه للخفوق المستتر
والدهر مايرحم حسب معلومتي
بوح الحنايا لازم احساس الصبر
لو جاهدت ساعه غدت مكلومتي
يالله تلطف في مواعيد الفجر
تايب وراجي صحوتي من نومتي
الغبن لا شبّعت روحي بالضجر
وش برتجي غير الالم من قومتي
ياساكن احساس السمو المفتخر
لـبيه ياشـامخ يجاري قمتي
سولف مطر واحكي ترانيم المطر
باغيب في شعبك وسافر امّتي
ارحل عروقي واشحن احساسي شهر
شفهم يبيعون العطا من سومتي
انا هـويتك  قبل تهديني العطر
وش تنتظر من قسوتك في لومتي
والله ماكنتي مواعيد وسفر
انتي تباشير الفرج في ظيمتي
يادفتري سجل مشاعرها شعر
ذيك التي تمطر سعادة غيمتي
ارقي سنود الحب لك قلبي مهر
واركي على الاضلاع وانخي شيمتي
من جزل افعال الكريم المقتدر
ابجزع الكتمان واعرف قيمتي
هـذا انا للبـوح اعماقي بحر
هذا انا مجمع حروف لكلمتي