ياحاضره

ياحاضره ليه العتب ليه الزعل ليه التعب

ليه التسامي مايكون اول خطاوي نظرتك

كلمة افا في خاطري واحمال من ليه وعجب

واسرار من صمت وذهول لاخر حنايا شيمتك

ياهل ترى في ضحكتك تلقين سلوى من يحب

او ياترى كل الحكي في ليل يسكن دمعتك

عني وربك التحف انفاس اوجاعك سبب

وهذا الحنين الي سراك واطياف فيها حضرتك

غريب واحساس الفراغ يملا فؤاد المكترب

ساهي مع نبضك اتوه في باب يطرق جيتك

ونبقى على رجوى بعض والجرح داخلنا ارب

عناد مني للغياب وعناد منك لغيبتك

طبيب جراح

ليا مساء النور والعشق ذباح...

يالي بحبك خافقي كم تكوى...

يا كم عليك القلب غرد وكم صاح...

بسمك ونادى يا حبيبي تروى...

حتى الكرى قد عاف جفني ولا ارتاح...

وانت الدوا ياغصن ورد(ن) تلوى...

اشتاق لك واحلمك والحلم ما زاح...

شوق(ن) على طاري عناقك مشوى...

ابيع لك عمرين.. واقول وش راح؟

حتى مقامك في فؤادي مضوى...

سارح.. على الذكرى طريقي.. ورواح...

ماغير امني خاطري.. واتقوى...

صح لسانك يبو سالم 

الرد

مثل المساء الي لحالك ! هنا طاح

الله كم عاند هدوئي وسوى

تبعدني الايام والشوق فضاح

وتردني ابيات شعر مزوى

وشذنب عيني تسهره ليل ماباح

ياقلب ردك لي ..بطيفه تطوى

ابسألك مابين جد ومزاح

ليت الثقه مابيننا ماتهوى

ادراكك الخافي عسى يوم ينزاح

ويطيب لآدم نبضه الي بحوى

والا قسم بالله طبيب جراح

يشق صدري طبه الى مدوى

غريبه

غريبه واسكنت روحي بلا استإذان 

غريبه واصبح الخاطر وله جاره

كما المطره بأول هدوة الهتان

بلا موعد ولا سلم ولاغاره

وانا الي ينوصف قلبي عظيم الشان

ثقيل ولي على الالحان قيتاره

وهو ضلع يلف القلب والشريان

بأقصى خافقي الصامت وفي ناره

يهم اني اعرفها صراخ كان

ومقعد ضيف في صدري لزواره

مخاوي ليل في طرقة شعور انسان

ادندن هاجسي من سابع اوتاره

ولي موقف ولي حدي ولي بيبان

ولي وقفه مع الاحساس واسفاره

وبي طيش وبي خوف وبه ميدان

واسلي عن شعوري تاره وتاره

بسيط الوجد لكني بلا عنوان

ولكن مهجعي في بارق اوزاره

الا ياساكنه ماقد مضى ماهان

ابين مجلسك لطروق سياره

يجنن عطرها الفاتن كما الاحسان 

وش اعذاري لطيف موقد اسراره

اتمتم ذكر ربي بسمه الرحمن

واغيبه وانتثر وارجع لمشواره 

يغيب الوصل ينسانا وحنا اوطان

وجن العقل والاعصاب منهاره

فمان الله مالي بالخيانه شان

ودونك يالغريبه باعلن اشهاره 

بسم رب الكون

بسم رب الكون عطال العشار

خالقي اعبده في ضيق وسرور

هو نجاتي والأماني والشعار

والثقه بالله وحسن الظن نور

في موازين البشر حنا نهار

يوم ذاك الليل مشكوك الظهور

مايهاب الليل اعمى بإختصار

لو فقد قمراه قلبه في حضور

اي نعم نبغى المراقي للكبار

والحلم دايم شواهق للنحور

فلا تخاف ولا تهون ولاتثار

واعذر الي خالفك بعض الأمور

وابتسم لو يومك اصبح في غبار

وافتهم فالصبر جايز للمرور

وان ثنتك العاطفه نحو انهيار

فاذكر انك وافي وشهم وجسور

ماملكنا الا بساتين القفار

ولا بغينا الليل في حكمه يجور

وفي اماني غربتك قم باقتدار

والحظوظ آمال توفي للصبور

والختام القلب في جنه ونار

ياعسى الراحات مابين السطور

هلت قمر

هلت قمر 

وزادت على الحاني وتر

من شفتها حسيت باحساس الغريب لموطنه

لون الثمر

 في خدها الوردي انتثر

ايام من عمري تقول ان الغلا مستوطنه

الرحيل

اعترف باني بقايا من حياه

ولابقى فيني من احساسك صهيل

خذ ذنوبي خذ هدوئي والنجاه

بس وادع واحترم فيني الرحيل

واعطني هجرك وخذ مني فداه

واعتبرني طيف غابر جوف ليل

الوفا بعدك ونسيانك واااااااااه

يالحنين الي ملاني للأصيل

الصبر طاعه لخاشع في صلاه

والسجود اعظم معاني للعليل

لا تكابر لا يضيع الاتجاه

شف طريق الرايح الي مايقيل

مايجي بالغصب مشروعي معاه

كيف اجامل واخدعه وانا بخيل

ماقدر اعطي للمشاعر في مناه

وداخلي ماضي كريم وعشق ويل

ياصحاري الوجد بلي هالشفاه

من عطش وعدكوانا في وسط سيل

شفني اغرق تحت طوفان المياه

انتشلني واسقني دمعه وحيل

ماقدر اشرب دون عهد الي نساه

لو يموت الفارس الي دون خيل

ماذبحني غير عنده والـ اناه

ولا ارتضي والله عن عينه بديل

هي هدايا العمر ولقلبي دواه

هي سمو الذات وشموخ النخيل

في تفاصيله عطيته من مداه

ياوحيدة خاطر الجاني الدخيل

يالبى احساسه الي في لباه

يوم انا اطلبه في قول وقيل

ثم يسكب لي من القهوه عطاه

والضحك لا قلت زيد ابن هيل

مانسيته لا وربي ماكماه

لو يكون الي يكون بلا كفيل

بسم رب الكون عالي في سماه

ابدتديته وانتهيتك بالرحيل

راتب

راتب ولكن مايكفي الحاجه

وانا في الحد الجنوبي قاطن

الظرف اعلن صرخةً دجاجه

وين انت يالي في نعيمه باطن

الفقر ينهش والخطا منعاجه

والجوع خاين والعدو متواطن

ابك الحقيقه بالكذب مزاجه

ماينقلون ابداً هموم مواطن

خانوا ثقتكم اكبر الديباجه

والعرف تدري دونهم يافاطن

الضو خافت في عموم سراجه

ابن البلد شغال عند الواطن